പണ്ടെന്നോ ആകാശവാണിയിൽ, യേശുദാസ് ആലപിച്ച ഈ ഗാനം സംഗീതസംവിധാനം നിർവ്വഹിച്ചിരിക്കുന്നത് പുകഴേന്തി എന്ന് കേട്ടപ്പോൾ ഏതോ തമിഴ് നാട്ടുകാരൻ എന്നാണ് കരുതിയിരുന്നത്. പിന്നെ പലവർഷങ്ങൾ കഴിഞ്ഞാണ്, അദ്ദേഹം തിരുവനന്തപുരത്തുകാരനായ വേലപ്പൻ നായർ എന്ന മലയാളിയാണെന്നും, തമിഴ് നാട്ടിൽ ചെന്ന് സംഗീത ലോകത്തേക്ക് കടന്നെന്നും അങ്ങനെയാണ് പുകഴേന്തിയെന്ന അപരനാമത്തിൽ അറിയപ്പെട്ടതെന്നും മനസ്സിലായത്.
'അപാരസുന്ദര നീലാകാശം അനന്തതേ നിൻ മഹാസമുദ്രം... ', "ഗോപുര മുകളിൽ വാസന്ത ചന്ദ്രൻ ഗോരോചനക്കുറി വരച്ചു.. " തുടങ്ങിയ ഗാനങ്ങളാണ് അദ്ദേഹത്തിന്റേതായി കൂടുതൽ കേൾക്കാറുണ്ടായിരുന്നതെങ്കിലും, പുകഴേന്തി സംഗീതം നൽകിയ അത്രമേൽ പ്രചാരം ഇല്ലാതിരുന്ന എന്നു തോന്നിയ ഒരു മനോഹരഗാനമാണ് "ഗോപുരക്കിളിവാതിലിൽ നിൻ നൂപുരധ്വനി കേട്ട നാൾ..."
കുറച്ചൊരു ഹിന്ദുസ്ഥാനി ഛായ തോന്നുമെങ്കിലും വൃന്ദാവന സാരംഗ എന്ന കർണ്ണാട്ടിക്ക് രാഗത്തെ അടിസ്ഥാനമാക്കിയാണത്രെ ഇത് ചിട്ടപ്പെടുത്തിയിരിക്കുന്നത്.
പി ഭാസ്കരന്റെ മനോഹരമായ വരികളിൽ, പ്രണയിനിയുടെ നൂപുരധ്വനി കേട്ടപ്പോൾ തന്റെ സംഗീതവും ശ്രുതിയും എന്തിനേറെ തന്റെ സങ്കല്പം തന്നെയും മറന്നുപോയെന്ന കവി ഭാവന! എങ്കിലും, ഒരു അന്തർമുഖനായ നായകന്റെ പ്രണയമാണോയെന്ന് ധ്വനിപ്പിക്കുന്നുണ്ട് കല്പടവിൽ എതിരേൽക്കാൻ മടിച്ചു നിന്നതും, പിന്നെ കണ്ണുനീരിൽ നൈവേദ്യമൊരുക്കി, പൊൻകിനാവുകൊണ്ട് സൽക്കാരം നടത്താമെന്ന് നായകന്റെ ആത്മഗതവും.
അയാളുടെ പ്രാണസഖി ആ പ്രണയസുധാ പാനപാത്രങ്ങൾ സ്വീകരിച്ചോ കഴുകി വച്ചോയെന്ന് തിട്ടമില്ല. കാരണം ഞാൻ, വില കുറഞ്ഞ മനുഷ്യർ എന്ന ആ സിനിമ കണ്ടിട്ടില്ല. എന്തിനേറെ, ഈ പാട്ടിന്റെ കൃത്യമായ രംഗം പോലും കണ്ടിട്ടില്ല.
എങ്കിലും ഏതോ ഗോപുരക്കിളിവാതിലിലൂടെ ആ നൂപുരധ്വനി കേൾക്കുമ്പോൾ, ആദ്യമായി നൂപുരം എന്ന വാക്ക് ചിരപരിചിതമാക്കപ്പെട്ടയിടത്തിലേക്ക് ഒന്ന് ഓടിപ്പോയി വന്നു. ഞാൻ പഠിച്ച, കരിവെള്ളൂർ എവി സ്മാരക ഗവ. ഹയർസക്കന്ററി സ്കൂളിന്റെ ഓരത്ത് അന്നുണ്ടായിരുന്ന ഒരു ഫാൻസി കടയുടെ നൂപുരം എന്ന പേര് ദിവസത്തിൽ ഒരു തവണയെങ്കിലും വായിക്കാതെ കടന്നുപോയിട്ടില്ല! പാദസരം എന്നല്ലാണ്ട് വേറെയൊന്നും പറയാത്ത നാട്ടിൽ ഇത്ര കാവ്യാത്മകമായൊക്കെ പീടികയ്ക്ക് പേരിട്ടത് ഏത് ഭാസ്കരൻ മാഷായിരുന്നോ ആവോ. ആ കടയൊന്നും അവിടെയിന്ന് ഇല്ലായെന്ന് തോന്നുന്നു.
 |
| ചിത്രം m3db യില്‍ നിന്നും |
ചിത്രങ്ങള്‍ക്ക് കടപ്പാട് : വിക്കിപീഡിയ , m3db.com
ലേഖകന്റെ ശബ്ദത്തില്‍ കേള്‍ക്കാം :
